حقيقة أزمة أسود قصر النيل.. القصة كاملة

شهدت الساعات الماضية تصاعد حدة أزمة أسود قصر النيل عقب أنتشار أنباء عن طلاء تماثيل الأسود العريقة باللون الأسود في إطار حملة صيانة.

وزير السياحة والآثار

وفي ذلك الصدد كشف وزير السياحة والآثار شريف فتحي، في تصريحات لـ”اكسترا نيوز”، عن التفاصيل الكاملة لصيانة تماثيل قصر النيل، مشددا على أهمية التواصل والتنسيق بين المؤسسات سواء كانت نقابية أو تنفيذية، بعيدا عن السوشيال ميديا.

أحد النقابات

قال “فتحي”: “الحقيقة الموضوع ده كله ابتدأ من السوشيال ميديا واللي عرفته أنه في أحد النقابات طبعاً اللي بنحترمها وبنحترم القائمين عليها نزلت حاجة على الفيس بوك أو على مواقع التواصل الاجتماعي..وأنا بالنسبة لي الحقيقة يعني ما كنتش عايز أن أنا أعلق على الموضوع ده لأنه التواصل النقابي أو التواصل في المؤسسات سواء كانت نقابية أو مؤسسة تنفيذية أو غيره ما بيتمش عن طريق السوشال ميديا، بيتم عن طريق الحوار، بنقدر نرفع التليفون نكلم بعض النقابات دي تتبع معالي زميل وزير الثقافة يقدر يتكلم معانا في الموضوع أو غيره للتوضيح، إنما طبعا لما رجعت الموضوع لقيت أنه الموضوع ده مش أول مرة، وزارة الأثار بتعمله كمعاونة للمحافظات واللي بيحصل أنه بيستعينوا بالمجلس الأعلى للأثار على أساس أنه هو يساعد في تنظيف وصيانة هذه التماثيل واللي فهمتوا أنه لما كشفوا على التماثيل نتيجة للصيانات السابقة ما كانش فيها صدأ وده دليل أنه الأعمال اللي تمت قبل كده كانت أعمال جيدة من ناحية حماية التماثيل”.

بيتنظف من التراب

وأضاف، وزير السياحة ولالآثار،: “اللي تم في التماثيل دي هو نفسه اللي تم قبل كده في أعوام سابقة لم يتغير اللون لم يتم إضافة أي لون ولا دهان ولا أي حاجة.. التمثال بيتنظف من التراب .. أنا ده حسب ما فهمت من الفنيين اللي أنا بقدر شغلهم كتير .. وبعدين بعد كده بيتغسل بمادة من صابون متعادل كده معين أو حاجة كده وبعدين بيتحطله طبقة كوتينج من بره ملهاش لون بتدي لمعة في الأول، إنما طبعا لازم نعمل في حسابنا إن ده بياخد سنين طويلة، بيبقا معرض للشمس والهواء والتراب والعوامل الجوية بصفة عامة فالحقيقة مفيش تغيير لون مفيش ما يدعو لابداء القلق مفيش يعني عايز أقول أنا الموضوع واخد يعني اهتمام على السوشيال ميديا أكبر من الحجم اللي هو يعني يجب أن ياخدوا”.

اقتراح للتحسين

وتابع الوزير شيف فتحي، “أي حد عنده أي اقتراح للتحسين هناك قنوات طبيعية جدا للتواصل في هذا الموضوع وإحنا بنرحب بيها في إطار التعاون وفي إطار عمل ما فيه مصلحة عامة للبلد وللأثار أو للتماثيل الثقافية اللي هي طبعا مش تبعنا في الأثار بس برضه ما زلنا نحترمها ونحافظ عليها”.

أسود قصر النيل

وأردف وزير الأثار عن موجة الشائعات التي واجهها بسبب أسود قصر النيل قائلا: ” طبعا مواجهة الشائعات شيء أساسي، نحن نواجه الشائعات بس هو في الأساس يجب أن لا ننصت لهذه الشائعات أو لا ننصت لما يثير الرأي العام خارج الأطر الشرعية .. يعني أنا النهاردة ممكن يعني عايز أقول ممكن حد يبعت لي او يتخاطب معي في موضوع معين عنده فكرة معينة الفكرة دي لما بيكلمني فيها بنقدر نتناقش فيها لو انا ما ردتش عليه في الفكرة دي او ان انا لم اتجاوب ساعتها ممكن يروح للسوشيال ميديا يقول انا كلمت الوزير والوزير لم يتجاوب وانا بشتغل لمصلحة الدولة انما النهاردة يبدأ التخاطب ببيانات صحفية من جهات لها صفة على السوشيال ميديا، السوشيال ميديا ليست وسيلة التواصل داخل الدولة المصرية ولا يتم بناء اجتماعات او تحسينات على بيانات بتطلع على السوشيال ميديا سوشيال ميديا انما العمل المؤسسي له القنوات بتاعته الطبيعية اللي يجب ان نتعامل من خلالها”.

الآثار المصرية

وأكمل “فتحي” : “حرصنا على الآثار المصرية بصفة عامة كنا برضه لازم نفرق بين ما هو مسجل أثار وبين ما هو من التراث، ويجب أن نحافظ عليه 100% وأظن السادة المتخصصين في مجال الآثار عارفين مدى حرصنا في خلال الفترات السابقة على آثارنا والحفاظ عليها وتطوير العمل بيها..وفعلا أي حاجة فيها مصلحة عامة احنا جاهزين ان احنا ننصت لها بس بالشكل الصحيح وبالشكل المؤسسي اللي هو يعمل إيجابية ويعمل يعني عايز اقول أية حالة من التعاون بصفة عامة مش موضوع ان انا بحاول يعني مش عايز اوضح اكتر من كده بس يعني هو موضوع مش موضوع اكشن أو ساسبنس أو حاجة زي كده”.

المجلس الأعلى للآثار

وفي ذات السياق كان أصدر المجلس الأعلى للآثار بياناً توضيحياً بشأن ما يتم تداوله حول طلاء تماثيل أسود كوبري قصر النيل باللون الأسود.

طلاء ملون

وأكد المجلس أن هذه المعلومات عارية تماماً من الصحة، حيث لم تشمل أعمال الصيانة على أي طلاء ملون أو ملمّع للتماثيل، موضحاً أن الإجراءات الحالية تهدف فقط لتنظيف وصيانة التماثيل وفقًا لأعلى معايير الحفاظ والترميم.

فريق الترميم

كما شدد المجلس حَسَبَ البيان أن فريق الترميم المعني يقوم بأعمال الصيانة بحرص شديد ووفقاً للقواعد العلمية والفنية المعترف بها.

التراث المصري

مؤكدا على أن التماثيل تحظى بقيمة فنية وتاريخية كبيرة تجعلها جزءاً من التراث الحضاري لمصر، ما يستدعي الاهتمام بها والحرص على الحفاظ عليها بصورة مستمرة.